ალბათ დაკვირვებიხართ – რაღაც სასიამოვნოს მოლოდინის შეგრძნება, ხანდახან, უკეთესია, ვიდრე თავად ის, რასაც ველოდებით.

ხომ ძალიან მიყვარს ახალი წელი, მაგრამ ჩემთვის მისი სამზადისი კიდევ უფრო  სასიამოვნოა. კარადის ზედა უჯრაში შენახული, მტვრიანი ნაძვის ხის ჩამოღებით დაწყებული, ნახევრად გამშრალი  ჩურჩხელების მოპარვით და ჩუმად ჭამით დამთავრებული (კი, დღემდე ვპარავ დედაჩემს ჩურჩხელებს), ყველაფერი განსაკუთრებულ სიამოვნებას მანიჭებს, რადგან ვიცი, რომ რაღაც კარგი ახლოვდება.

თუმცა, ახლა ალბათ გაიფიქრეთ, რომ ეს ახალი წელი არ არის ისეთი, როგორიც წინა წლებში იყო. ადამიანებმა შემცირებული ბიუჯეტი იმ წლის სამზადისს უნდა გააწვდინონ, რომელიც არ იციან რას მოუტანს. მაგრამ, მეორეს მხრივ, სურთ ნეგატიური ტალღისგან ცოტა ხნით მაინც გადაინაცვლონ ჯადოსნურ სამყაროში და ბავშვებივით დაიჯერონ, რომ სასწაულები სწორედ იქ ხდება, სადაც ელოდებიან.

რა თქმა უნდა, ცვლილებები ადამიანების ქცევაში ბიზნესს და მათ საახალწლო კომუნიკაციასაც შეეხო. არადა, მათი რეკლამები და კამპანიები ჩვენთვის კიდევ ცალკე დღესასწაულია: ვინმეს წარმოგიდგენიათ ახალი წელი Coca-Cola -ს საახალწლო მუსიკისა და სანტას გარეშე?   John Lewis-ის  სიყვარულითა და სიკეთით სავსე რეკლამებიც უკვე მერამდენე წელია  ჩვენი საახალწლო  რიტუალის ნაწილი გახდა. ბრენდების აქტიურ კომუნიკაციას, რა თქმა უნდა, გაყიდვების მაღალი მაჩვენებელიც მოჰყვება. შესაბამისად, ახალი წელი მათთვის მომგებიანი სეზონია.

წელს მდგომარეობა  შეიცვალა:  ბიუჯეტისა და ენერგიის დახარჯვა რეკლამებში, მაშინ, როცა, ადამიანებს არ ჰქონდათ მათი პროდუქტების ყიდვის ფინანსური შესაძლებლობა და განწყობა, შესაძლოა ბრენდებისგან ფუჭ შრომად მოგვეჩვენოს, მაგრამ იმ კომპანიებმა, რომლებიც მომხმარებლის ქცევას კარგად სწავლობენ, იციან, თუ რა არის მათი წარმატების მთავარი საიდუმლო: ეს არის  ემოცია, რასაც მათი რეკლამები, მათი კამპანიები იწვევს ადამიანებში. პროდუქტი, რომელსაც ისინი სამიზნე აუდიტორიას სთავაზობენ, შესაძლოა კონკურენტებსაც ჰქონდეთ, მაგრამ მომხმარებლები  სწორედ იმიტომ ირჩევენ მათ, რომ ამ ბრენდებთან ემოციურად არიან დაკავშირებული. ამ კავშირს კი, ის აქტივობები იწვევს, რომლებიც  მომხმარებლის ინტერესიდან და სურვილიდან გამომდინარეობს.

წელს ადამიანები  მიეჩვიენ  უარყოფითი ინფორმაციის  მოსმენას ყველგან და ყველასგან. თავიანთი საყვარელი ბრენდებისგან კი ისინი ელიან გამხნევებას, ემოციურ მხარდაჭერას. ამიტომ, ასეთმა კომპანიებმა ძირითადად მაინც შეინარჩუნეს ოქროს შუალედი და თავიანთ კომუნიკაციაში აუდიტორიას აგრძნობინეს ის  ემოციური მხარდაჭერა, რაც მათ ამ რთულ პერიოდში ყველაზე მეტად სჭირდებოდათ.

Coca-Cola -სა  და Lewis -ზე რომ აღარ შევჩერდეთ, ჩემთვის უკვე საყვარელ რამდენიმე ვიდეო რგოლს გაგიზიარებთ, სადაც კარგად ჩანს, თუ როგორ მოარგეს ბრენდებმა  მომხმარებლისა და ბიზნესის მოლოდინები  ერთმანეთს პანდემიური ახალი წლის პერიოდში.

McDonald’s – მა  გვერდი არ აუარა მოცემულ რეალობას და ვიდეორგოლში რამდენიმე წამით, მაგრამ მაინც, გვაჩვენა ნაცნობი სიტუაციები: პირბადიანი კონსულტანტი, კომენდანტის საათი, დისტანციური რეჟიმი, მაგრამ თან დაგვანახა, რომ  ჯადოსნური ახალი წელი ყოველთვის შეიძლება დადგეს. ამისთვის ცოტა წარმოსახვა და სიყვარული საკმარისია. მან მოგვცა ბიძგი, რომ ჩვენც, როგორც შეგვიძლია, ამ ახალ წელს ერთმანეთზე ზრუნვითა და სიხარულის განცდით  შევეგებოთ.

შეუძლებელია დადებითი ემოციების კასკადი არ მოგაწყდეთ, როცა Amazon – ის ამ სარეკლამო რგოლს ნახავთ. გარდა იმისა, რომ ვიდეორგოლი საოცრად დახვეწილი და  სასიამოვნო საყურებელია, ის ძალას გვმატებს და შთაგვაგონებს, რომ მიუხედავად ამ წლის სირთულეებისა, ყოველთვის შეიძლება გამოსავლის პოვნა და მოძრაობის გაგრძელება. თუნდაც მაშინ, როცა სავალ გზაზე ხედვა გართულებულია.

რამდენიმე კვირის წინ საახალწლო რეკლამების ცაზე  ქართულმა ბრენდებმაც გაიელვეს. ზოგიერთი მათგანი იუმორით  გვახსენებდა კოვიდ 19-ისგან მიღებულ  ზარალს და მისი ანაზღაურებისკენ გვიბიძგებდა, ზოგმა კი ირიბად მიგვანიშნა, რომ დაპაუზებული წლის შემდეგ ცვლილებების ჯერი დადგა.

საბანკო მომსახურების ახალი მოთამაშის, „რებანკის“ ამ ვიდეორგოლში პანდემიაზე პირდაპირი მინიშნება არსად ჩანს,  მაგრამ ჩემში და ალბათ ბევრ თქვენგანშიც, მან  გააჩინა განცდა, რომ ახალი 2021 წელი ცვლილებების და საკუთარი სურვილების მიყოლის წელი უნდა იყოს.

ბრენდები, რომლებსაც აქვთ პრეტენზია იყვნენ მომხმარებლის ცხოვრების განუყოფელი ნაწილი, ყოველთვის აყვებიან ადამიანების გულის ხმას და იქნებიან დროისა და სიტუაციის შესაბამისი. სხვა შემთხვევაში, ისინი დაკარგავენ ემოციურ კავშირს მომხმარებელთან, რაც თავისთავად მათ გაყიდვების მაჩვენებელზეც იმოქმედებს.

ჩვენ მიერ განხილულ თითოეულ რეკლამას ადამიანების განწყობის სწორად შესწავლა აერთიანებს. კომპანიებმა გააცნობიერეს, თუ რას ელოდა მათგან მომხმარებელი, ამიტომაც  ცალსახად არ უბიძგეს მათ პროდუქტის ყიდვისკენ, არც ისე მოიქცნენ, თითქოს პანდემია არ არსებობდა. ამ ბრენდებმა გვაჩვენეს, რომ ახალი  წლის ჯადოსნურად ქცევა სინამდვილეში სანტა კლაუსს, ან ელფებს კი არა, სიყვარულით სავსე და ერთმანეთზე მზრუნველ ადამიანებს შეუძლიათ.

 

ავტორი: ლალიტა კვიჟინაძე