ძველ მეგობართან შეხვედრას მაინც არაფერი სჯობს. როგორი ახალგაზრდაც არ უნდა იყო, კიდევ უფრო ღრმა ახალგაზრდობას გახსენებს და გულსაც უხარია. გასულ საღამოს, ძველი, უკვე კარგად ნაფიქრი ფიქრებისგან დასაცლელად და ახლებისთვის გზის დასათმობად, ცოტა ხნით გარეთ გასეირნება გადავწყვიტე. ბევრი ვიარე, თუ ცოტა, ფიქრებიდან დაჟინებულმა, ნაცნობმა მზერამ გამომარკვია. ქუჩის მოპირდაპირედ ჩემი ძველი, თვალებით მომღიმარი მეგობარი იდგა. თითქოს, ადამიანს წლების უნახავ მეგობართან სალაპრაკო არ უნდა გამოელიოს, მაგრამ, როცა ტრადიციული „როგორ ხარ? – კარგად, შენ?“ დავამთავრეთ და პანდემიის თემაც ამოვწურეთ, მივხვდით, რომ სათქმელი აღარაფერი გვქონდა, გარდა იმ ჩუმი ამოსუნთქვისა, სათქმელს რომ უძღვის ხოლმე წინ. ბოლოს, „გამიხარდა შენი ნახვით“ დავამთავრეთ და ჩვენ ჩვენი გზით წამოვედით.

ასეა, როგორც კი მუდმივი კომუნიკაცია წყდება, ჯერ ნაცნობობის დრო დგება, მერე ძველი ნაცნობობის და ბოლოს იქამდეც მივდივართ, რომ წლების შემდეგ, სრულიად შემთხვევით, ქუჩაში ვხვდებით და ზუსტად ორ წუთში, უხერხული ღიმილით ვშორდებით ერთმანეთს.

არ გეგონოთ, ეს მარტო ჩვენი, ადამიანების პრობლემა იყოს. ასეა ბიზნესშიც. ბიზნესში კი, ამ შემთხვევაში, იმ კომპანიებს ვგულისხმობთ, რომელთა კომუნიკაციაც რაიმე აქციასთან ერთად იწყება და ამავე აქციასთან ერთად წყდება. შემდეგ კი რამდენიმეთვიანი დუმილის რეჟიმში გადადიან და შორიდან უყურებენ, როგორ უახლოვდებიან მათი კონკურენტები მათივე მომხმარებლებს.

ეს კომპანიები განსხვავებული მიდგომის საჭიროებას ალბათ, ჯერ კიდევ მაშინ დაინახავდნენ, როცა მიხვდნენ, რომ მომხმარებლებთან სასაუბრო თემა ამოეწურათ და ისინიც ნელ-ნელა ძველ ნაცნობებად იქცნენ. მჭიდრო ურთიერთობისთვის მათთან მუდმივი კომუნიკაციაა საჭირო, მაგრამ არც ის ივარგებს, გაუთავებლად საკუთარ თავზე ვილაპარაკოთ. გამოსავალი არსებობს, თუმცა რამდენადაც მარტივია სათქმელად, თუ როგორ ჩამოვაყალიბოთ მომხმარებლებთან მჭიდრო კავშირი, იმდენადვე რთულია ეს რეალობაში განსახორციელებლად.

კონკურენციის ამბავი მოგეხსენებათ, შესაბამისად, დღეს ბიზნესის წარმატებაში მომხმარებელი მთავარ როლს ასრულებს, თუმცა წარმატებამდე არსებობის საკითხი დგას. მართლაც, უკმაყოფილო მომხმარებელს ჩვენი შემცვლელის საპოვნელად დიდი ძალისხმევა არ დასჭირდება, უფრო მეტიც, საერთოდ არ დასჭირდება, რადგან ჩვენი კონკურენტი თავად იპოვის მას და თავის მომხმარებლად აქცევს. ამიტომ, დღევანდელი კონკურენციის პირობებში, ბრენდებს საკუთარი ღირებულებისა თუ საჭიროების მუდმივი მტკიცება უწევთ.

არც ისე შორეულ წარსულში, ყველანი დიდი ინტერესით ვეცნობოდით ჩვენამდე მოსულ ნებისმიერ გზავნილს, რადგან არც თუ ისე ბევრი არჩევანი გვქონდა. თუმცა დღეს, ადამიანების ყურადღების მიქცევა სტანდარტული სარეკლამო შეთავაზებებით რთულია, რადგან უკვე ბევრის მომსწრენი გავხდით. ბიზნესის სტრატეგიებიც საპასუხოდ შეიცვალა. კომპანიები მიხვდნენ, რომ მხოლოდ საკუთარ თავზე საუბრით ფონს ვერ გავიდოდნენ. მომხმარებლის ერთგულების მოსაპოვებლად განსხვავბული მიდგომა იყო საჭირო. ამიტომ კომპანიებმა, რომლებმაც ეს კარგად გააცნობიერეს, თავისი მომხმარებლების მოსმენა დაიწყეს და მათ საჭიროებებსა თუ ინტერესებს ფეხდაფეხ აჰყვნენ. გაჩნდა კონტენტ მარკეტინგის ცნება, უფრო სწორად, როგორც ხდება ხოლმე, იყო, მაგრამ ახლა თავისი სახელი დაერქვა.

რადგან ვახსენეთ, ორი სიტყვით საპნის ოპერებზეც მოგიყვებით. კონტენტ მარკეტინგის ისტორია ჯერ კიდევ გასულ საუკუნეში დაიწყო, როდესაც დღესდღეობით, ყველასათვის კარგად ნაცნობი, ამერიკული კორპორაცია Procter & Gamble (P&G), სხვებზე ადრე მიხვდა, რომ საკუთარი ბრენდების გასაძლიერებლად განსხვავებული მიდგომა იყო საჭირო. იმ პერიოდში, 20-იან წლებში, აშშ-ში თანდათან უფრო პოპულარული ხდებოდა რადიო. ამასობაში, ფირმის ხელმძღვანელობამ მცირე კვლევა ჩაატარა და მნიშვნელოვან დასკვნამდეც მივიდა. 1932 წელს P&G-მა რადიო სერიალის – The Puddle Family-ის სპონსორობა ითავა, რომლის მსვლელობისას, შესვენებები კომპანიის პროდუქციის რეკლამებს დაეთმო. ეს იყო პროდუქციის კონტენტში ინტეგრირების ერთ-ერთი პირველი მცდელობა. შედეგად, კომპანიამ სამუდამოდ დაიპყრო ამერიკელი დიასახლისების გულები. და რადგან პროგრამას საპნის წარმოებით ცნობილი კომპანია ასპონსორებდა, სანაცვლოდ, მათ საყვარელი სერიალი “საპნის ოპერად“ მონათლეს.

თუმცა, მას შემდეგ ამ მიდგომებშიც ბევრი რამ შეიცვალა, განვითარდა, დაიხვეწა, ახალი ფორმატები და მასშტაბები შეიძინა და საბოლოოდ, მივიღეთ ის, რაც მივიღეთ – კონტენტ მარკეტინგი.

განსხვავებით ტრადიციული მარკეტინგისგან, რომელიც პირდაპირ პროდუქციის პრომოციისკენ არის მიმართული, კონტენტ მარკეტინგის ყურადღების ცენტრში მომხმარებელი და მისი ინტერესებია. ამ შემთხვევაში კომპანიის კომუნიკაცია არა მხოლოდ პროდუქტსა და მის სარგებელს, არამედ აუდიტორიისთვის ღირებულ, სხვადასხვა თემებს ეხება. თუმცა, ცხადია, კომუნიკაცია კვლავ კავშირშია კომპანიასთან და მის საქმიანობასთან.

ამგვარად, ეს სტრატეგია აუდიტორიისთვის საინტერესო, საჭირო, ემოციური ინფორმაციის მიწოდებას გულისხმობს, რომელიც მათ დაამახსოვრდებათ, რაზეც ისინი ისაუბრებენ, გაუზიარებენ სხვებს ემოციებსა და შთაბეჭდილებებს. შესაბამისად, სტანდარტულ რეკლამასთან შედარებით, კონტენტ მასალებს ბევრად მეტი ნახვა და ჩართულობა აქვს. მიზეზი მარტივია – კონტენტ მარკეტინგი არ სწყვეტს აუდიტორიას იმ ინფორმაციას, რაც მათ ისედაც აინტერესებთ, რისთვისაც სტუმრობენ ისინი სხვადასხვა პლათფორმებსა თუ სოციალურ ქსელს. ამის ნაცვლად, კომპანიის შეთავაზება შესაძლოა, კონტენტში იყოს ჩართული, რაც ჩვენთვის, როგორც მომხმარებლებისთვის ნაკლბად გამაღიზიანებელი და მეტად საინტერესოა.

მართალია – რაც მოვისმინეთ არც მარტივად ჟღერს და არც მომენტალურ შედეგს მოგვიტანს, თუმცა მოდით, ცოტა შორს გავიხედოთ. კონტენტ მარკეტინგის სარგებელი გრძელვადიან და კიდევ უფრო გრძელვადიან პერსპექტივაშია.

ამგვარი მიდგომა, პირველ რიგში, ზრდის კომპანიის აუდიტორიას მათზე მორგებული, ღირებული კონტენტის წარმოების გზით, და საბოლოოდ, ბევრ მათგანს, საიტის სრულიად უცხო ვიზიტორებს, კომპანიის ერთგულ მომხმარებლად აქცევს.

Adidas-ზე უკეთ ალბათ, ეს არავინ იცის. წლების წინ, 2011 წელს ბრენდმა უზარმაზარი ძალისხმევა მიმართა კონტენტ მარკეტინგზე და მსოფლიო თასისთვის წინასწარ დაამზადა ასობით ვიდეო ტურნირის ყველა შესაძლო შედეგის გათვალისწინებით, რათა თამაშის დასრულებისთანავე შესაბამისი ლაივ კონტენტი გამოექვეყნებინათ. ცხადია, მათ კარგად ესმოდათ, რომ ამ ვიდეოების უმეტესობა გამოუყენებელი დარჩებოდა, თუმცა ის ერთი ვიდეო, რომელსაც მსოფლიო პირველს იხილავდა, და რომელიც იქნებოდა იმ მომენტისთვის ყველაზე ღირებული და მოთხოვნადი, ბრენდს უამრავ ახალ მიმდევარს გაუჩენდა. ასეც მოხდა. ვიდეო, ბრენდის სახელთან და ეფექტურ სლოგანთან ერთად – “All in or nothing”, გახდა ვირუსული და ფაქტობრივად, მთელმა მსოფლიომ ნახა.

დარწმუნებული ვარ, სტრატეგიული კომუნიკაციების სფეროში ხშირად მოისმენთ აზრს, რომ ბრენდებს ისეთივე ცხოვრება აქვთ, როგორც ადამიანებს. ისინი საკუთარი მისიით, ღირებულებებით, ინტერესებითა და ხასიათით ცხოვრობენ. სწორედ ეს განაპირობებს იმ ემოციურ კავშირსა და მიჯაჭვულობას, რასაც ბრენდებსა და მათ ერთგულ მომხმარებლებს შორის ვხვდებით. ცხადია, ბრენდი ამ ცხოვრებით არ იბადება. ამისთვის ჯერ ადამიანური თვისებები უნდა შეიძინოს. სწორედ ესაა კონტენტ მარკეტინგის მეორე და მთავარი დანიშნულება – აამეტყველოს ბრენდი, როგორც პიროვნება და არა როგორც კომპანია, რომელიც მხოლოდ რაიმეს ყიდის.

ასე რომ, გვახსოვდეს, კონტენტ მარკეტინგი არ მოუწოდებს აუდიტორიას ყიდვისაკენ. მნიშვნელოვანია, მოვიქცეთ ისე, რომ ადამიანებს თვითონ გაუჩნდეთ სურვილი, გახდნენ ჩვენი მომხმარებლები – ვუამბოთ საინტერესო ამბავი, მივცეთ რჩევა, შევუქმნათ განწყობა, ვაჩუქოთ ემოცია და ასე დავამყაროთ მათთან მჭიდრო, გრძელვადიანი კავშირი, რაც მართლაც რომ ხანგრძლივი სიცოცხლის გარანტიაა ჩვენი კომპანიისთვის.

 

ავტორი: სალომე ქვრივიშვილი